شهر رمضان
أيام الفاطميين
أيام الفاطميين
احتفالات الفاطميين برمضان ورثناها فى العصر الحديث والتاريخ الفاطمى مليان بالعادات الرمضانية الجميلة زى الفوانيس وموائد الرحمن.
كل واحد فينا نفسه يرجع بالزمن لواحد من العصور القديمة ونشوف ازاي الناس كانت بتقضي رمضان وقتها,علشان كده حبينا نتكلم عن رمضان ايام الدولة الفاطمية وخصوصا ان معظم التقاليد والعادات الرمضانية اللي موجودة دلوقتي ورثناها من العصر الفاطمى.
اعلان حلول الشهر
بمجرد ما يتشاف هلال رمضان والناس تتاكد من حلول الشهر بيتعمل مهرجان كبير احتفالا بقدوم الشهر الكريم ومن مراسم المهرجان ده خروج الخليفة الفاطمى من باب الذهب (واحد من ابواب القصر الفاطمى ) وبيكون لابس ملابس فخمة وحواليه الوزراء بتوعه فى احلى ملابسهم وبيكونوا راكبين خيول بسروج مذهبة وبيكونوا ماسكين رماح ذهبية واعلام حرير وكان موكب الخليفة بيبدا من بين القصرين (شارع المعز حاليا) وبيمر بالجمالية وباب الفتوح وباب النصر ويرجع تاني لباب الذهب.
صلاة الجمعة
كانت صلاح الجمعة التانية فى رمضان بتتصلى فى جامع الحاكم والثالثة فى الجامع الازهر والاخيرة كانت فى جامع عمرو بن العاص وبعد الجمعة الاخيرة بيتذاع بلاغ رسمى كان معروف وقتها بسجل البشارة, واخر ليلة من رمضان كان القراء والمنشدون بيقضوها فى القصر الشرقى الكبير وكان الخليفة فى اخر السهرة بيوزع على الحاضرين دنانير دهب.
سوق الشماعين
من اهم الاسواق فى العصر الفاطمى هو سوق الشماعين, وده لان الاطفال كانوا بيروحوا السوق ده علشان يشتروا الشموع اللي ينوروا بيها الفوانيس ده غير انه كان فيه مجموعة شموع كل شمعة فيها وزنها حوالى (10 رطل) كان الاطفال بيلفوا حوالين شمعة من الشموع دي بالفوانيس ويغنوا احتفالا برمضان.
موائد الرحمن
يعتبر الخليفة الفاطمي “العزيز بالله” اول واحد عمل مائدة رحمن فى شهر رمضان علشان يفطر عليها اهل “جامع عمرو بن العاص”,وكمان عمل مائدة رحمن مستمرة طول الشهر فى الجامع الازهر مباح لاي حد يروح يفطر هناك,وكان بيخرج من مطبخ القصر فى رمضان 1100 طاجن من كل انواع الطعام بتتوزع كل يوم على المحتاجين والضعفاء.
تعليقات: 0
إرسال تعليق